ഓച്ചിറ, ക്ലാപ്പന, ഉസ്താദ് അബ്ദുല്‍ മജീദ് മൗലവി മര്‍ഹൂം.
ഇലാ റഹ് മത്തില്ലാഹ്:
-മൗലാനാ അബ്ദുശ്ശകൂര്‍ ഖാസിമി
ഇസ്ലാമിന്‍റെ വിശാല വീക്ഷണത്തിലും വൈജ്ഞാനിക കാര്യങ്ങളിലും വളരെ ഉന്നത നിലപാട് സ്വീകരിച്ച ഒരു വ്യക്തിത്വമായിരുന്നു ഉസ്താദ് അബ്ദുല്‍ മജീദ് മൗലവി. വിവിധ സ്ഥലങ്ങളില്‍ മഹത്തായ സേവനമനുഷ്ഠിച്ച ഉസ്താദിനെ മഹാനായ ഗുരുവര്യന്‍ ചന്തിരൂര്‍ ഇബ്റാഹീം മൗലാനാ (റഹ്) അവര്‍കളോടൊപ്പമാണ് ആദ്യം പരിചയപ്പെടുന്നത്. ഉസ്താദ് സേവനം ചെയ്തിരുന്ന പുനലൂര്‍ ഭാഗത്ത് ഖാദിയാനികളുടെ ചില പരിശ്രമങ്ങള്‍ നടക്കുന്നതറിഞ്ഞ ഉസ്താദ് ഞങ്ങളെയും കൂട്ടി അവിടെ ചെന്നു. അബ്ദുല്‍ മജീദ് മൗലവി ചന്തിരൂര്‍ ഉസ്താദിനെ വളരെ സ്നേഹത്തോടെ സ്വാഗതം ചെയ്യുകയും ഖത്മുന്നുബുവ്വത്തിന്‍റെ പ്രവര്‍ത്തനത്തിന് പരിപൂര്‍ണ്ണ സന്നദ്ധത അറിയിക്കുകയും ചെയ്തു. ഖത്മുന്നുബുവ്വത്തുമായി ബന്ധപ്പെട്ട് തയ്യാറാക്കപ്പെട്ട രചനങ്ങള്‍ വായിച്ച് ഉസ്താദ് കൂടുതല്‍ അടുത്തു. തുടര്‍ന്ന് കടയ്ക്കാട് ജുമുഅ മസ്ജിദില്‍ ഖത്തീബായി വന്ന സന്ദര്‍ഭത്തില്‍ സ്നേഹബന്ധം വളരെ വര്‍ദ്ധിക്കുകയുണ്ടായി. നമസ്കാരം-ദിക്ര്‍-ദുആകളില്‍ വലിയ ശ്രദ്ധയുള്ളതിനോടൊപ്പം ഒരു സമയവും പാഴാക്കാതെ ഗ്രന്ഥ പാരായണത്തില്‍ മുഴുകുമായിരുന്നു. സംസാരിക്കുമ്പോഴെല്ലാം വിവിധ വൈജ്ഞാനിക മേഖലകളെ കുറിച്ച് ചര്‍ച്ച ചെയ്തിരുന്നു. ഇതിനിടയില്‍ ഞങ്ങള്‍ ഒരുമിച്ച് ഹജ്ജ് യാത്രയ്ക്ക് അവസരമുണ്ടായി. യാത്രയില്‍ ഓരോ സ്ഥലങ്ങളില്‍ പോകുമ്പോഴും ഗ്രന്ഥങ്ങള്‍ കണ്ടെത്തി വായിക്കാനും വാങ്ങിക്കാനുമുള്ള ആഗ്രഹത്തിലായിരുന്നു. അല്‍ ഫിഖ്ഹുല്‍ ഇസ്ലാമി വഅദില്ലത്തുഹു എന്ന ഗ്രന്ഥം അവിടെ നിന്നും കൊണ്ട് വരികയും കടയ്ക്കാട് മസ്ജിദിലെ മുറിയില്‍ ശബ്ദത്തില്‍ അത് വായിക്കുകയും വരുന്നവരോടെല്ലാം അതിനെ കുറിച്ച് വിശദമായി പറഞ്ഞുകൊടുക്കുകയും ചെയ്യുമായിരുന്നു. അനാചാരങ്ങളോടും അന്ധവിശ്വാസങ്ങളോടും കടുത്ത എതിര്‍പ്പായിരുന്നു. മഹല്ലില്‍ നടക്കുന്ന വീടുകളിലെ പരിപാടികളില്‍ പങ്കെടുക്കുകയും ദുയ്ക്ക് മുമ്പ് പ്രസ്തുത പരിപാടിയുടെ യാഥാര്‍ത്ഥ്യവും അതില്‍ നിന്നും ഉള്‍ക്കൊള്ളേണ്ട സന്ദേശങ്ങളും വളരെ നല്ല നിലയില്‍ ജനങ്ങള്‍ക്ക് മനസ്സിലാക്കി കൊടുക്കുകയും ചെയ്യുമായിരുന്നു. ഓച്ചിറ ദാറുല്‍ ഉലൂമുമായി വലിയ അടുപ്പമായിരുന്നു. ഇവിടെ ഏത് പരിപാടികളിലും പങ്കെടുക്കുകയും ദീനിയായ നസ്വീഹത്തുകള്‍ കേട്ട് കണ്ണീര്‍ വാര്‍ക്കുകയും ചെയ്യുമായിരുന്നു. അല്ലാഹു ഉസ്താദിന് പരിപൂര്‍ണ്ണ മഗ്ഫിറത്ത്-മര്‍ഹമത്തുകള്‍ നല്‍കട്ടെ.! ഉയര്‍ന്ന ഗുണങ്ങള്‍ പരമ്പര പരമ്പരയായി നിലനിര്‍ത്തുകയും സമുന്നത ഇല്ലിയ്യീനില്‍ അല്ലാഹു സ്ഥാനം നല്‍കുകയും ചെയ്യട്ടെ.! കൈതോട് വലിയവഴി മസ്ജിദിലും സേവനമനുഷ്ഠിച്ചിരുന്നു.
അവസാന നാളുകളില്‍ സ്വദേശത്ത് തന്നെയുള്ള മസ്ജിദില്‍ സേവനമനുഷ്ഠിച്ചു. ഇമാമത്ത് നില്‍ക്കാന്‍ തീര്‍ത്തും അവശനായ സന്ദര്‍ഭത്തിലും ജമാഅത്ത് നമസ്കാരത്തില്‍ വലിയ ശ്രദ്ധ കാണിച്ചിരുന്നു. പ്രസ്തുത സന്ദര്‍ഭത്തില്‍ ഇമാമത്തിന്‍റെയും ഖുതുബയുടെയും അവസരം ഓച്ചിറ ദാറുല്‍ ഉലൂമിന് നല്‍കിയത് വളരെ നന്ദിയോടെ സ്മരിക്കുന്നു. ഈ സന്ദര്‍ഭങ്ങളിലും ഇവിടെ നിന്നുള്ള സഹോദരങ്ങളുടെ ഇമാമത്തില്‍ വലിയ സംതൃപ്തി പുലര്‍ത്തുകയും ചെയ്തിരുന്നു. അവസാന നാളുകള്‍ മരണത്തെ പൂര്‍ണ്ണമായും പ്രതീക്ഷിച്ച് കഴിയുന്ന നിലയിലായിരുന്നു മര്‍ഹൂമിന്‍റെ പ്രവര്‍ത്തനങ്ങളും സംസാരങ്ങളും. ഇന്ന് രാവിലെ (2021 ജൂണ്‍ 28 (തിങ്കള്‍) ഉച്ചയോടെ പടച്ചവന്‍റെ റഹ്മത്തിലേക്ക് യാത്രയായി. ഖബ്റടക്കം മഗ്രിബ് നമസ്കാരാനന്തരം ക്ലാപ്പന മഞ്ഞാടി ജുമുഅ മസ്ജിദ് ഖബ്ര്‍സ്ഥാനില്‍ നടത്തപ്പെട്ടു.
മര്‍ഹൂമിന്‍റെ മര്‍ഹമത്തിനും മഗ്ഫിറത്തിനും വേണ്ടി ദുആ ചെയ്യുക.
അല്ലാഹുവേ, മര്‍ഹൂമിന് നീ പൊറുത്തുകൊടുക്കുകയും കരുണ ചൊരിയുകയും സൗഖ്യം നല്‍കുകയും മാപ്പ് നല്‍കുകയും ചെയ്യേണമേ.! മര്‍ഹൂമിന്‍റെ ആഗമനം നീ ആദരിക്കേണമേ.! അദ്ദേഹത്തിന്‍റെ പ്രവേശന സ്ഥലം നീ വിശാലമാക്കേണമേ. വെള്ളം കൊണ്ടും മഞ്ഞുകൊണ്ടും ഹിമക്കട്ടിക്കൊണ്ടും നീ കഴുകേണമേ.! വെള്ള വസ്ത്രം മാലിന്യത്തില്‍ നിന്ന് ശുദ്ധീകരിച്ചെടുക്കുന്നതുപോലെ നീ പാപങ്ങളില്‍ നിന്ന് ശുദ്ധീകരിക്കേണമേ.! ഏറ്റവും നല്ല ഭവനവും ഏറ്റവും നല്ല ബന്ധുവിനെയും ഏറ്റവും നല്ല ഇണയേയും നീ പകരം നല്കേണമേ.! നീ സ്വര്‍ഗ്ഗത്തില്‍ പ്രവേശിപ്പിക്കുകയും ഖബ്റിലെയും നരകത്തിലെയും ശിക്ഷയില്‍ നിന്ന് നീ രക്ഷിക്കുകയും ചെയ്യേണമേ.! ബന്ധുക്കള്‍ക്ക് സമാധാനം നല്കേണമേ.!
🔹🔹🔹Ⓜ🔹🔹🔹
പ്രയോജനപ്രദമായ ധാരാളം രചനകള്‍
പരിചയപ്പെടുന്നതിനും പ്രയോജനപ്പെടുത്തുന്നതിനും
സയ്യിദ് ഹസനി അക്കാദമി, മുഫക്കിറുല്‍
ഇസ് ലാം ഫൗണ്ടേഷന്‍, സ്വഹാബ ഫൗണ്ടേഷന്‍
പോലുള്ള പ്രസാധകരുടെ പ്രസിദ്ധീകരണങ്ങള്‍ക്കും
മായം കലരാത്ത ശുദ്ധമായ തേന്‍ (swahaba honey)
ഗുണനിലവാരവും മണം നിലനില്‍ക്കുന്നതുമായ
നല്ല അത്തറുകള്‍ ആവശ്യമുള്ളവരും ബന്ധപ്പെടുക:
ലോകോത്തര പെര്‍ഫ്യൂംസ് കമ്പനിയായ
അജ്മല്‍ ഇന്ത്യാ പെര്‍ഫ്യുംസിന്‍റെ അത്തര്‍,
സ്പ്രേ, ഊദ്, ബഖൂര്‍ എന്നിവയും ഞങ്ങള്‍ വിതരണം ചെയ്യുന്നു.
വിളിക്കൂ...
Allahummagfirlahu
ReplyDelete